ஆயிஷா மைந்தன்

"இந்த மக்கள் எவ்வளவுதான் சொன்னாலும் திருந்த மாட்டாங்கப்பா... அங்கே பாருங்க! பஸ்ஸூல எப்படி தொங்கிகிட்டு போறாங்க பாருங்க... என்று பஸ்ஸை சுட்டிக்காட்டிய பாலா,

டிரைவருங்க இப்படி ஏறாதீங்கன்னு எத்தனை முறை சொன்னாலும் பசங்க கேட்க மாட்டாங்க... அப்புறம் தவறி கீழே விழுந்து ஏதாவது ஆச்சுன்னா டிரைவருக்கு அடியும் உதையும்தான். இதுக்கு பயந்து அந்த டிரைவர் அடிபட்ட ஆளுக்கு முதலுதவி செய்யவோ, ஆம்புலன்சுக்கு சொல்றதையோ விட்டுட்டு தலைதெறிக்க ஓடி போயிடறாரு...'' என்றார்.

"ஏங்க அப்படி தொங்கக் கூடாதுன்னு பசங்ககிட்ட சொன்னாலும் டிரைவருக்கும், கண்டக்டருக்கும் அடி உதைதாங்க... என்ன நீங்க இதெல்லாம் கவனிக்கறதில்லையா...?'' என்று இளைஞர்களின் குறையைக் கூறினார் பீட்டர்.

"ஆனா இந்த மாதிரி சூழ்நிலை நம்ம நாட்டுல மட்டும் தாங்க இருக்கு...'' என்ற பெரியார் பிரியன் "வெளிநாடுகளில் ஏதேனும் விபத்து நடந்தா அவங்களுக்கு முதலுதவி செய்வாங்க... பக்கத்தில் உள்ள ஆஸ்பத்திரிக்கு கூட்டிட்டு போவாங்க... ரொம்ப ஆபத்தான சூழ்நிலைன்னா ஆம்புலன்ஸை கூப்பிட்டு மருத்துவமனைக்கு அனுப்பிட்டு டிரைவரும் கூடவே போவாரு. ஆனா நம்ம நாட்டுல டிரைவரு தப்பிச்சோம், பிழைச்சோம்னு ஓடி தப்பிடுவாரு, அல்லது காவல் நிலையத்திற்குப் போய் சரணடைஞ்சுடுவாறு...'' என்றார்.

"எந்த டிரைவரும் வேணுமின்னே விபத்து ஏற்படுத்தறதில்லைங்க. நம்ம மக்கள்தான் நிறைய தப்பு பண்றாங்க. ரோட்டில் மட்டுமில்லை. தண்டவாளங்களை கடக்கும்போது கூட ரொம்ப உதாசீனமாகவோ அல்லது திமிராகவோத்தான் நடக்கிறாங்க. ரயில் ரொம்ப பக்கத்துல வந்துட்டாலும் கூட பயப்படுறதும் இல்லை, கண்டுக்கறதும் இல்லை. இது பற்றி மக்களிடம் விழிப்புணர்வே இல்லை...'' என்று தன் பங்குக்கு சொன்னர் பீட்டர்.

"அட நான் நேரடியா பார்த்த ஒரு மேட்டரைச் சொல்றேன் கேளுங்க... என்ற பீட்டர், "சில நாட்களுக்கு முன்னால நான் புறநகர் ரயில்ல பயணிச்சப்ப கோடம்பாக்கம் ரயில் நிலையத்துல ரயில் மெதுவா போச்சுங்க... ஏன்ன அங்கே மேம்பாலம் ஒண்ணு கட்டுறாங்க... அப்போ அந்த ரயில் நிலையம் பக்கத்துல ஒருத்தன் தண்டவாளத்தை கடந்தான். நானும் மத்தவங்களும் பாத்துக்கிட்டே இருந்தோம். "டாய் டாய்...''ன்னு ஒரே கூச்சல் குழப்பம். அவன் என்னடான்னா தண்டவாளத்தை கிராஸ் பண்றன்னு அப்படியே தண்டவாளத்தை தாண்டி ஓடுனான் பாருங்க... அவ்வளவுதான் ரயில்ல அடிபட்டு அங்கேயே விழுந்துட்டான். அதைப் பார்த்த எல்லோருக்கும் ரொம்ப வேதனையாப் போச்சு. அப்புறமென்ன ஆள் ஸ்பாட் அவுட்... என்று நேரடி நிகழ்ச்சி ஒன்றை விவரித்தார். நண்பர்கள் அந்த நபருக்காக வருத்தப்பட்டனர்.

"பத்தாம் வகுப்பு, பன்னிரண்டாம் வகுப்பு பரீட்சை நடக்குறதால தேர்வு நேரத்தில் நடக்கும் ஐ.பி.எல் கிரிக்கெட்டை தள்ளி வைக்கணும்னு சொன்ன மேட்டரை யாரும் கண்டுக்கவே இல்லையே...?'' என ஃபாரூக் கேட்க,

"யாரு கண்டுக்கப்போறாங்க... சொல்லிச் சொல்லி பிளஸ் டூ தேர்வும் முடிஞ்சாச்சு. இப்போ டென்த் எக்ஸாம் நடக்குது. மேட்சை முழுசுமா உட்கார்ந்து பார்க்கா விட்டாலும் ஸ்கோர் என்னன்னு அடிக்கடி தெரிஞ்சுக்க ஆசைப்படுவாங்க. படிப்பே ஓடாது. யாருகிட்ட சொல்லி என்ன பிரயோஜனம். இந்த அப்பாவி மக்கள்தான் கிரிக்கெட்டை இந்தியாவின் மானம் காக்கும் ஒரு வீரமாக கருதுறாங்க... விளையாடுறவங்க பணத்துக்காக விளையாடுறாங்க. தோத்தாலும் பணம்; ஜெயிச்சாலும் பணம். எதுல பணம் அதிகமா கிடைக்குமோ அதை செய்வாங்க. சினிமாவில் உடம்பை காட்டி பிழைப்பு நடத்தினவங்க இப்போ கிரிக்கெட் வியாபாரம் செய்ய ஆரம்பிச்சிருக்காங்க. ஒவ்வொரு அணியையும் ஒவ்வொரு நடிகை விலைக்கு வாங்கி இருக்காங்க...